寫真館

哇！這是幼稚園个畢業像呢！我佇佗位啦？…佇遮啦！第三排倒手爿算來第四个！著毋著？哈！囡仔疕（phí），看毋出！

喂！毋通叫是難民哦！這是阮唯故鄉搬來萬里，佇海墘仔稅厝帶，有一日故鄉个小弟來𨑨迌（tshit-thô），我𤆬（tshuā）怹（in）去泅水，轉來翕个像。頭一排正手爿算起：新港个叔伯小弟惟寬、惟鏗、惟在；第二排正手爿算起：阿爹、我、惟助、淑卿、阿母；第三排大姑个囝阿惠兄。

我高中个時，阿母做產婆，偆一寡仔錢，買這間「萬里木工廠」，這是阮第一擺家己買厝徛。你看！壁頂掛一个「洪吳煖助產士」，撩柴間仔後壁著是產房啦。阿爹佮阿母趁个錢互阮讀冊拄好。這是過年翕个像，門聯是阿爹家己做、家己寫个哦！頭前一隻狗，叫Michi (美智)，日本名啦！

Michi（日本名：美智、みち）是阮兜个寶狗。阿母逐日都有人叫去抾囝，閣卡山頂、閣卡半冥嘛愛行，每一擺出門，Michi一定綴阿母去。到甲阿母抾囝煞，Michi才做伙轉來。阿母有這隻寶狗保護，什麼都毋驚！Michi真善良，阮兜迄隻麒麟尾个貓仔，中晝時著peh起去伊个身軀頂睏，伊毋捌受氣。

我大學个時，阿母搬去金山開業。這是小妹淑卿大學畢業，卜去美國以前，佮英侯結婚，兄弟姊妹做伙翕个像。

牛奶島大學畢業以前，逐家攏愛去仁愛莊受嚴格个政治教育佮職業教育。我佇遮讀兩年，佮Nolih(のり，施明德个日本名)拄好共班。我選修「陶藝」，這是我个兩件作品。我佇牛奶島大學留學六年八個月，繪畫、彫刻作品五十幾件，陶藝作品卜五十件，大部分送人，一部分留佇仁愛莊，我手頭留無10件。

一九七九年轉來，隔轉冬著黃美慈結婚。八一年二月六日，敦謙出世，拄好唅雷根總統仝生日。第一擺做老父，外歡喜咧汝咁知！

隔轉冬个八二年，第二囝敦涵相紲來出世。敦謙加一个小弟仔做伴，汝看！伊也想卜共伊抱看眛咧呢！哈哈！汝夭細漢，抱袂贏啦。

一九八四年九月，秋天一个好天日，阮𤆬（tshuā）兩个細囝，做伙去阿里山𨑨迌（tshit-thô）。汝看，敦涵夭咧學行niâ啦。回憶起來，實在是一段幸福个日子

一九八七到八八，受著石碇風景个吸引，我堅持搬去遐隱居，阿珍也放棄家己个助產士開業，歸家伙仔佇蓬菜寮帶一年。阮帶佇一間百年个古厝，想‧著 著歸家伙仔𤆬（tshuā）=咧 來去山頂peh山。囡仔講怹（in）佇遮製造上儕个童年回憶。

古厝 百年个歲月 刻佇咖啡色个石壁頂 佮風化个皺痕((jiâu-hûn))。壁頂有一空，這是為著卜防土匪，佇兩尺个石壁所開个「銃空」(tshìng-khang)，證明伊是夭有土匪个清朝時代起个。

一九八八年二月我受台美基金會个邀請，經過日本東京，遊美國一周，唯加州、德州、紐約、波斯頓、尼加拉瀑布、鹽湖城、科州、西雅圖，唯夏瓦夷轉來。這是三月初七佇紐約佮謝里法合影。

最後一站來到風景優美个夏瓦夷（ハワイ），受著鄭良偉教授个招待，一九八八年五月四日 佇一个台灣人个聚會佮教授、先生娘合影。

一九八八年起，我來佇中央研究院語言研究所服務，第一年佇南港稅厝徛，第二年著佇汐止買厝，這個恩愛个鏡頭 是佇汐止个茄苳水沖(tsuí-tshiân、瀑布) 翕个。

一九九四年正月，阿珍𤆬（tshuā）阿母佮兩个囝來日本佮我過年，我𤆬（tshuā）怹（in）對東京𨑨迌（tshit-thô）到九州。當時樋口靖教授佇竺波大學服務，佇遮娶台灣留學生麗秋，生一個會曉講台灣話个日本仔囝Noboru（のぶる）。一个好天時兩家人做伙佇竺波附近个公園留影。

一九九五年阿母个身體已經真荏(lám)，帶佇阮汐止个兜，淑卿轉來台灣探親，九月四日做伙翕相。淑卿閣轉來是阿母出山个時。

台灣方言地理學个開山祖，師大副教授鍾露昇先生是我語言學个啟蒙師，伊教我結構主義語言學，方言調查，佮新派个漢語聲韻學，對我一生个語言研究影響真大。一九七三年八月淑卿佮英侯代替我去西雅圖拜訪鍾老師。

王競雄老師是我哲學个啟蒙師，伊佇文化學院哲學系教一年，以後著接受毓老个資助，佇獅頭山隱居讀冊，我逐月日都有去揣伊，唯本體論、認識論到物理哲學，無所不談。這是佇獅頭山一間廟寺个合影。

一九七○年我退伍，研究所夭未開學，一個熱天時，王競雄佇太魯閣一个禪寺隱居，我也佇遮過一個快樂个熱天。王老師開始佮我談馬克思主義，我个思想開始左傾，兩年後著去牛奶島大學研究六年八個月。佇禪寺熟視陳瑞麟(倒手爿第一个)，著是後擺出名个散文作家、國代陳列。兩年後个一九七二年閣見面，竟然是做伙入去共間大學，閣帶共房間。真有緣！

一九七○至七二年，佇師大國文研究所，專攻語言=个 干礁竺家寧佮我，所以阮上相好。以後家寧佇聲韻學界出名，現時佇中正大學中文系。這是佇教室內翕个像，上倒手爿是家寧，中央是美國留學生Chapman(賈克文)。

中央研究院語言所个台灣閩南語方言調查个大計畫結束，一九九六年九月我入清華大學語言研究所閣去讀冊，我是清華上老个學生。這是九八年九月二九，佮共博士班个學姊蕭素英、學弟鄭曉峰做伙去瑞典Lunds 大學參加31屆漢藏語國際研討會翕个像。

一九九八年十一月廿七日出名个閩語學家華盛頓大學Jerry Norman(羅杰瑞)教授來清大演講，我佮鄭曉峰有共伊做一个訪問，寫一篇訪問稿。這是佇清大人文社會學院頭前翕个像，中央鬍鬚个美國人著是羅教授，上倒手爿是伊个學生金字塔出版社个頭家黎明光。

一九九○年李登輝總統任命郝伯村擔任行政院長，全國夯狂(giâ-kông=掠狂lia̍h-kông)起來，五月二十反軍人干政大遊行，阮歸家伙攏有去參加。舉白布條个囡仔，正爿是敦謙、倒爿是敦涵。

一九九一年八月十七台灣語文學會成立，我是發起人之一，也是第一任秘書長。這是成立大會舉行个情形，主席是清華大學曹逢甫教授。主席倒手爿第二个留喙鬚个是本人。當時會名規定愛掛「中華民國」，二○○二年我擔任第六屆个會長，這四字才提掉。

台灣語文學會成立，第一項空課著是制訂一套實用个台語音標，一九九一年八月三十一日成立「台灣語言音標研究小組」，以黃宣範(後排右三)為召集人、董忠司(前排左二)、鍾榮富為副召集人，經過三個半月五次个研討會議，制訂影響深遠个TLPA，著是教育推薦公告个台語音標个底本。這是十二月一日佇新雨佛教中心舉行第五次研討會部分委員个留影。

一九九五年「台灣台語社」正式成立。這是二月十九佇汐止老人活動中心開成立大會个像。參會个貴賓佇我个正手爿第一位是台北縣政府機要秘書台大教授張國龍先生；徛=咧=个是中央研究院研究員、現任國史館館長張炎憲教授。

一九八五年起，我開始走遍台灣，進行台灣方言个調查。一九八六年訪問埔里守城份(Tsiú-siânn-hūn) Kahabu（噶哈巫）平埔族个老人潘郡乃，當時守城份Kahabu族會曉講族語个人偆無十个。現時潘郡乃已經過身，會曉講族語个Kahabu敢偆無五个。正手爿是𤆬（tshuā）路个楊文彬先生，後來當選國大代表。

一九九四年佇日本天理大學研究，為著卜寫小川尚義个傳記，訪問小川个公子、當時已經八十幾歲个小川次郎醫師。

我有開過幾ā个台語班，培養台灣民間文學个調查人才。後來參加台北地區相褒歌調查計畫个林金城、朱金城、黃美慈、沈明達、黃振坤。這是一九九八年十二月三日𤆬（tshuā）學生去汐止山頂小坑做訪問 翕个相片。參加計畫个前三个學生有佇相片中。

二○○○年起我受國科會个資助開始進行台灣閩南語个社會方言調查。這是二○○一年我𤆬（tshuā）助理佮學生去宜蘭做訪問，經過員山一間民宿，予頭家吳明一先生(左四)請食茶，伊个倒手爿是宜蘭相褒歌个專家林錦賢(右三)。

法隆寺東院

（待補詳述）

（待補詳述）